dilluns, 7 d’octubre del 2013

el gobiernu asturianu niégase a reconocer a los guerrilleros antifranquistes


http://www.memoriayrepublica.org/?p=3360

04/10/2013 por 
Dende la Federación Asturiana Memoria y República denuncien que’l gobiernu asturianu integráu pola FSA-PSOE niégase a reconocer a los guerrilleros antifranquistes propuestos va tiempu pola asociación.
 comandante-robert-cabritu

Nel añu 2010 la Federación Asturiana Memoria y República (FAMYR) realizó una campaña pa llograr la reconocencia de dos guerrilleros antifascistes asturianos, Cristino García Granda y José Antonio Alonso “Comandante Robert”. En dicha campaña solicitóse al Parllamentu Asturianu la concesión de títulu de “Fíos predilectos d’Asturies” que s’otorga añalmente a persones nacíes nel Principáu que se destacaren polos sos méritos rellevantes. Lo mesmo fixo l’Asociación de Descendientes del Esiliu español, pidiendo amás la Medaya de Plata pa los Resistentes asturianos en Francia mientres la Segunda Guerra Mundial: Aladino Castro, Vicente García Riestra, José Antonio Alonso Alcalde, Comandante Robert y Ángel Álvarez Fernández.
Per desgracia, pesie a ser sofitada la primer propuesta poles firmes de más de 2.000 ciudadanos y por 72 organizaciones, y la segunda pola mayoría de los conceyos asturianos, el pidimientu foi torgáu. Nel so llugar el gobiernu de Francisco Álvarez Cascos maniobró con una cortina de fumu, como fai siempres la drecha, allegando a la llamada Transición, y nomó pa la de medaya d’oru a Rafael Fernández, presidente del ente preautonómicu d’Asturies (a títulu póstumu), a Alberto Aza, xefe de la Casa del Rei, y pa les de Plata a los pás del estatutu d’autonomía: Gerardo Iglesias, Juan Luis de la Vallina, Emilio García-Pumarino y Jesús Sanjurjo. Nun negamos la importancia histórica p’Asturies d’estes persones que bien podríen ser propuestes pal añu siguiente.
Nel añu 2013 la Federación Asturiana Memoria y República (FAMYR), l’Asociación pa la creación del archivu de la guerra civil, les brigaes internacionales, los neños de la guerra, la resistencia, la guerrilla y l’esiliu español (AGE) y l’Asociación de Descendientes del Esiliu Español retomaron una nueva campaña estendiéndola a toos aquellos guerrilleros y resistentes antifascistes asturianos qu’entá quedaben vivos. El 13 de Xunu de 2013 Anton Saavedra, Faustino Zapico y Rafael Velasco, en representación de 1.200 firmes, de persones, y 63 de colectivos, al amparu de lo previstona Llei 4/86, de 15 de mayu, reguladora de los honores y distinciones del Principáu d’Asturies, nos sos arts. 5 a 9, regula les condiciones pa la concesión de la Medaya d’Oru, nel so Art. 10, la figura de Fíu Predilectu, y nos Art. 13 y 18 del indicáu cuerpu llegal, el procedimientu pa la concesión de diches distinciones, presentaron, tantu nel Gobiernu d’Asturies, como ante la Xunta Xeneral, una iniciativa pa solicitar la concesión del titulo de FÍU PREDILECTU D’ASTURIES”, pa los siguientes guerrilleros antifranquistes:

1. Aladino Castro
2. Vicente García Riestra.
3. José Antonio Alonso Alcalde, Comandante Robert
4. Felipe Matarranz, Comandante Llobu
5. Ángel Álvarez Fernández
6. Felipe Martín Payares
7. Ángel Villar Melandru
8. Alfredo Rotella Moren
9. Ánxeles Álvarez Fernández
10. Gregorio Cenitagoya
11. Aquilino Gómez
12. Joaquín Fernández
Y la MEDAYA D’ORU D’ASTURIES” pa
1º-José Vitini
2º- Cristino García Granda
Dicha iniciativa foi almitida a trámite pola Presidencia de la Xunta Xeneral, que dio treslláu a los 5 grupos parlamentarios de la mesma, ensin qu’a fecha de güei los impulsores recibieren nin siquier una contestación por escritu de les razones poles cuales se dexó aparcada en dalgún caxón del parlamentu, despreciando con ella non yá a les persones propuestes, sinón tamién a la memoria de los que representen y de xacíu a los miles de persones y decenes de colectivos que sofitaron la mesma.
El Gobiernu d’Asturies tampoco nun contestó a la mesma, y prefirió dexar ensin conceder la Medaya d’Oru primero que dala a les persones propuestes, despreciando con ello tamién a militantes socialistes que sofitaron activamente esta campaña.
De los propuestos pa la condición de fíos predilectos, murniamente güei yá finó Aquilino Gómez, de lo cual fíxéronse ecu los medios de comunicación.
L’actuación del Gobiernu d’Asturies, despreciando una iniciativa ciudadana como la indicada, confirma la vergoñosa realidá anguaño nel estáu español, de la qu’Asturies nun s’escapa, na cual oficialmente a los guerrilleros sigue dándose-yos la condición de bandoleros y terroristes (calificación por tantu non amnistiable nin siquier pola preconstitucional llei d’Amnistía), yá que les sos sentencies condenatorias franquistes siguen tando vixentes.
Dende va años, y ante tolos gobiernos democráticos, gobernara quien gobernara, AGE col sofitu d’otres asociaciones y dellos diputaos de grupos parlamentarios d’esquierdes, reclamó la so reconocencia xurídica. El parlamentu español refugó toles Proposiciones de llei, enmiendes y entrugues parlamentaries, presentaes pa que la so equiparación a tolos niveles colos antiguos miembros de les Fuerces Armaes oficiales republicanes fuera una realidá. Ye una situación vergoñosa, incomprensible, inaudita y absurda n’otres democracies que sufrieron pasaos fascistes, nes que se reconoz y honra a la resistencia.
Por tou lo anterior apuraba, pos, una reconocencia de la llucha pola llibertá de el defensores del llexítimu réxime republicanu, d’igual manera como procedieron n’otros países como Francia, Alemaña o Rusia, por poner tres ejemplo. Nesti sentíu, René Pérez, responsable de la Unión de Excombatientes Franceses n’España, reivindicando la igua d’esta inxusticia, afirma qu’ “A los guerrilleros franceses que llucharon contra’l nazismu considérase-yos héroes nacionales; tienen una pensión especial, los mutilaos reciben asistencia na casa y fueron condecoraos en repitíes ocasiones.”
Murniamente n’Asturies el parllamentu y el gobiernu actual siguieron con dichu desprecio y esmemoria, lo cual oblíganos a salir públicamente pa denuncialo, esixendo a les autoridaes indicaes qu’asuman la iniciativa ciudadana qu’el 13 de Xunu de 2013 llegó a les sos manos y nun vuelvan desoyer la voz de la cai, representada por diches firmes, nin tanto la necesidá insoslayable de que los lluchadores antifascistes y antifranquistes n’Asturies sían reconocíos como merecen. Ye absolutamente necesario que se repare esti imperdonable erru y a lo menos enantes de final d’esti añu, primero que muerra dalgunu más de los propuestos, cuando menos la condición de fíos predilectos seya reconocía pa toos ellos.

http://infoasturies.net/index.php/asturies/item/2229-famyr-denuncia-quel-gobiernu-asturianu-ni%C3%A9gase-a-reconocer-a-los-guerrilleros-antifranquistes#.Uk5QWNlxzn4